મોરબી પંથકમાં બાઈક ચોરી કરતી ટોળકી સક્રિય થઈ હોય બાઈકચોરીનાં બનાવો સામે આવી રહ્યા છે ત્યાં ડિઝલ ચોરી કરતી ટોળકી સક્રિય થઈ હોવાનું સામે આવ્યું છે જેમાં નેશનલ હાઈવે પર ડિઝલ ચોરી કરતી ટોળકી સક્રિય થઇ હોય અવારનવાર ગોડાઉનમાંથી ડિઝલ ચોરાઈ જતું હોવાથી ખુદ વેપારીએ વોચ ગોઠવી ડિઝલ ચોરોને મધ્યરાત્રીએ ઝડપી પાડીને મોરબી સીટી બી ડિવિઝન પોલીસને હવાલે કર્યા હતા.
આ બનાવ અંગે જાણવા મળતી વિગતો મુજબ મોરબી નેશનલ હાઇવે ઉપર પ્લોટ નં. 15, સર્વે નં. 191, ડેકોર સીરામીકની બાજુમાં આવેલ ખોડીયાર પેટ્રોલીયમ નામનું ગોડાઉન ધરાવતા કૃષિતભાઇ મંગળજીભાઇ સુવાગીયા (રહે. શીવમ પાર્ક સોસાયટી, માધવ હોલની બાજુમાં, મોરબી-2) ના ગોડાઉનમાં છેલ્લા લાંબા સમયથી એલડીઓ(ડીઝલ) ની ચોરી થતી હોવાથી ગોડાઉન માલિક વેપારીએ વોચ ગોઠવી હતી જેમાં મોડીરાત્રે ગોડાઉન ચેક કરવા જતા ગોડાઉનની દીવાલ ઠેકી અંદર પ્રવેશેલા શખ્સો ડીઝલના કેરબા ભરતા હોવાનું જણાતા ચોર ચોરની બૂમો પાડી ચોરને પડકારતા આજુબાજુમાંથી લોકો એકત્રિત થઈ ગયા હતા અને લાલજીભાઈ રણછોડભાઈ ધોળકીયા (રહે.લીલાપર રોડ, સરકારી આવાસ, ત્રણ માળીયા, 16 બ્લોક નં. 103 મોરબી), રવિભાઈ જગદિશભાઈ ભીમાણી (રહે. જનકલ્યાણ સોસાયટી, જનકલ્યાણ મંદિર પાસે, મોરબી) અને નિકુલભાઈ દિલિપભાઇ ભીમાણી (રહે. માધાપર શેરી નં.1, મોરબી) નામના ત્રણ ઈસમોને ઝડપી પાડીને બી ડિવિઝન પોલીસના હવાલે કરવામાં આવ્યા હતા.
મોરબી સીટી બી ડિવિઝન પોલીસે ડીઝલ ચોર ત્રિપુટી વિરુદ્ધ આઇપીસી કલમ ૩૮૦, ૪૫૭, ૧૧૪ મુજબ ગુન્હો નોંધી ગોડાઉનમાં દીવાલ કુદીને રાત્રીના સમયે અંદર ગેરકાયદેશર પ્રવેશ કરી ઓફીસના ટેબલના ખાનામા રાખેલ રૂ. 1000 રોકડા તથા એલ.ડી.ઓ.(ડીઝલ) આશરે 75 લીટર (કિ.રૂ. 6750) સહિત કુલ રૂ. 7750 ની ચોરી કરવા મામલે ધોરણસરની કાર્યવાહી હાથ ધરી છે.
