પ્રમુખ અને ચીફઓફિસર ગેરહાજર હોવાથી મહિલાઓએ તેમના નામનાં છાજીયા લીધા !
દુર્ગંધ મારતાં દુષિત પાણીનાં કારણે રોગચાળો ફેલાવવાનો ભય
મોરબી નગરપાલિકામાં શાસન બદલાયુ, સત્તા સ્થાને બેઠેલા ચહેરાઓ બદલાયા પણ લોકોની સમસ્યાનો ઉકેલ હજુ નથી આવતો અને સમસ્યાઓ એની એ જ છે. ખાસ કરીને ઉભરાતી ગટરની સળગતી સમસ્યા હલ કરવામાં મોરબી પાલિકા તંત્ર સદંતર નિષ્ફળ નીવડ્યું છે જેમાં મોરબીના છેવાડા વિસ્તાર લાયન્સનગરમાં ગટરની સમસ્યાએ આડો આંક વાળી દેતા હવે ગટરના ગંધાતા દૂષિત પાણી લોકોના ઘરોમાં ઘુસી જતા સ્થાનિક લોકો વિફર્યા હતા અને મહિલાઓના ટોળાએ નગરપાલિકાએ દોડી જઈને મોરચો માંડ્યો હતો ત્યારે ચીફ ઓફિસર કે પ્રમુખ હાજર ન હોવાથી બંનેના નામના હાય-હાયના નારા લગાવી લોકોએ ત્રણ દિવસમાં ગટરના પ્રશ્નનું નિરાકરણ ન આવે તો પાલિકાને તાળાબંધી કરવાની ચીમકી આપી છે.
મોરબીના નવલખી રોડ ઉપર આવેલ લાયન્સનગર શેરી નંબર 1 ના રહીશોએ આજે નગરપાલિકા કચેરીએ દોડી જઈને ભૂગર્ભ ગટર પ્રશ્ને ઉગ્ર રજુઆત કરી હતી કે તેમની શેરીમાં છેલ્લા છ મહિનાથી ભૂગર્ભ ગટર ચોકઅપ થઈ ગઈ હોવાથી શેરીમાં નદીના વહેણની માફક ગટર ઉભરાઈ છે. ગટરના પાણી આખી શેરીમાં રેલમછેલ થઈને વહેતા હોવાથી ભારે ગંદકીને કારણે મચ્છરોનો ઉત્પાત વધ્યો છે. આથી મેલરીયા સહિતના રોગચાળાનું જોખમ વધ્યું છે. છેલ્લા છ મહિનાથી ઉભરાતી ગટરે હવે સ્થાનિક રહીશોનું જીવવું હરામ કરી દીધું છે જેમાં હવે તો છેલ્લા કેટલાક સમયથી શેરીમાં ઉભરાતી ગટરનું કદ એટલું બધું વધી ગયું છે કે ગટરના દૂષિત પાણી લોકોના ઘરમાં ઘુસી ગયા છે. તેથી રોગચાળો વકરવાની ભારે દહેશત વર્તાય રહી છે.
ગટર પ્રશ્ને સ્થાનિક લોકોએ અનેક રજુઆત કરી હોવા છતાં તંત્રના પેટનું પાણી હલ્યું નથી. બીજી બાજુ ગટર ઉભરાતી હોવાથી પરિસ્થિતિ નાજુક બની ગઈ છે. લોકોના ઘરમાં ગટરના પાણી ઘુસી ગયા હોવાથી નાના બાળકોમાં રોગચાળો ફેલાય રહ્યો છે. આથી આજે સ્થાનિક મહિલાઓ રજુઆત કરવા નગરપાલિકાએ દોડી ગઈ હતી પણ જવાબદાર ચીફ ઓફિસર કે પાલિકા પ્રમુખ હાજર ન હોવાથી લોકો રોષે ભરાયા હતા અને ચીફ ઓફિસર તેમજ પાલિકા પ્રમુખના નામના હાય-હાયના નારા લગાવ્યા હતા તેમજ જો ત્રણ દિવસમાં ગટરની સમસ્યાનું કાયમી નિરાકરણ નહીં આવે તો નગરપાલિકાને તાળાબંધી કરવાની ચીમકી આપી હતી.
